Мин, Хәбибрахманова Минзилә Мөдәрис кызы, таулы Кукмара районының Ядегәр авылында 1987 елның 4 маенда дөньяга килгәнмен. Минем авылым - матур табигатьле, челтерәп аккан көмеш сулы чишмәләргә бай авыл.

Мәктәп тәмамлаганга да ике дистә елга якын вакыт узды. Ә тормыш юлларым мәктәптән барыбыр аерылмады. Хәзер инде үзем укытучы. Һәр иртәне дәрескә ашыкканда да, сыйныф ишеген ачып кергән вакытта да, балаларның җавап көтеп текәлгән сораулы күз карашларын күргәндә дә ирексездән балачагым күз алдыма килеп баса. Һәм мин һәркем өчен тәүге уку йорты булган мәктәпнең кеше тормышында никадәр мөһим урын тотканлыгына янә бер тапкыр ышанам.

2010 нчы елдан, Казан Дәүләт университетының татар филологиясе факультетын тәмамлаганнан алып бүгенге көнгә кадәр мәктәптә татар теле һәм әдәбияты укытам.

Мәктәптә эшләгән 13 ел дәверендә билгеле бер тәҗрибә тупладым. Укучыларыма татар телен өйрәтеп кенә калмыйм, ә әхлакый яктан камил, җәмгыятебез өчен файдалы шәхесләр итеп тә тәрбияләргә тырышам.

Олы максатларыма ирешү өчен замана белән бергә атлыйм, үзем белән сабырлыгымны, намусымны, изге ниятләремне ияртәм.

Барыр юлым, кылган эшем югары нәтиҗәләр китерсен иде!